صيانة السيارات

طلمبة البنزين ماهي مشاكلها، وكيفية الحفاظ عليها

اقرأ في هذا المقال

  • ما هي وظيفة طلمبة البنزين.
  • ايه هي مشاكل طلمبة البنزين.
  • الصواب والخطأ في نظريات الحفاظ على طلمبة البنزين.

طبعاً في عدد من المكونات اللازمة لتشغيل محرك أي سيارة بصورة مستقرة وسليمة، ولكن في بعض القطع اللي نقدر تقول عليها القاعدة الأساسية لتشغيل المحرك بصورة مناسبة، على رأس هذه القطع طلمبة البنزين، في مقال إنهاردة هانتكلم عن وظيفة طلمبة البنزين، ومشاكلها، وطريقة إصلاحها، ونظريات طرق المحافظة عليها.

ايه هي وظيفة طلمبة البنزين؟

وظيفة طلمبة البنزين -زي ما هو واضح من إسمها-هي ببساطة إمداد المحرك بالكمية والضغط المناسب من الوقود، ففي أنظمة الوقود القديمة كان بيتم الاعتماد في النقطة دية بشكل كلي على ضخ الوقود للمحرك عن طريق طلمبات ميكانيكية، مع وحدة منفصلة غالباً لقياس مستوى الوقود بتانك البنزين او الجزء اللي بنسميه بالعوامة.

ولكن حالياً بيتم استخدام ما يسمى بوحدات التغذية المتكاملة أو (Fuel Sending Unit)، بمعنى وجود وحدة متكاملة فيها طلمبة الوقود (اللي بقت كهربائية حالياً) مع حساس قياس مستوى الوقود (العوامة) في بدن واحد متصل، وأحياناً كمان بتكون فيها منظم الضغط (لو عايز تعرف أكتر عن أنظمة الوقود شوف المقال ده).

ما هي مشاكل طلمبة البنزين؟

صورة توضح طلمبة البنزين

أهمية وظيفة الطلمبة بتخلي أي مشكلة تخصها مشكلة بالغة الأهمية، فبدون طلمبة مافيش عربية من الأساس، لذا مراقبة أداء الطلمبة برغم انه مش سهل عملياً، إلا إنه بالغ الأهمية، فملاحظة أي تقصير في أداء الطلمبة لازم تتم متابعته بشكل سريع لأن الطلمبة غالباً بتقرر أنها تستقيل من شغلتها بشكل مفاجئ وتعطل وتسبب مشاكل سخيفة تضع المالك في مواقف أسخف، لذلك أولاً لازم نعرف ان متابعة عمل الطلمبة، وإصلاح أي مشكلة متعلقة بيها أمر مهم للغاية.

مشاكل طلمبة البنزين (أو نتكلم بقه عن وحدة التغذية المتكاملة) تتلخص في 3 نقاط أساسية هي:

  1. عطل بالموتور الكهربي للطلمبة أو اللي نعرفه كلنا باسم قلب الطلمبة.
  2. عدم أداء الطلمبة لوظيفتها بشكل صحيح، يعني بتضخ وقود، لكن بشكل غير مستقر أو بضغط اقل من المفترض.
  3. عدم قيام سنسور قياس الوقود (العوامة) بوظيفته الأساسية بصورة صحيحة.

عطل الموتور الكهربي لطلمبة البنزين (قلب الطلمبة) بيكون إما بسبب تلف الموتور نفسه، أو بسبب عدم توصيل جهد كهربي للموتور نفسه، وبيتم التأكد من سبب المشكلة ببساطة بقياس الجهد على أطراف فيشة الطلمبة، لو في كهرباء على أطراف الفيشة بعد فتح الكونتاك يبقى خلاص المشكلة من قلب الطلمبة نفسه ويجب تغيره بآخر جديد وسليم، لو مافيش كهرباء عند أطراف الفيشة يجب أن يتم مراجعة الفيوز الخاص بالطلمبة، والتأكد من قيام ريلية الطلمبة بوظيفته وهي توصيل الجهد للطلمبة.

لو القلب شغال ولكن ضغط الوقود أقل من المسموح لتشغيل المحرك بشكل سليم ومستقر، المشكلة هنا بتحتاج قدرة فنية أفضل للكشف على سبب المشكلة، كمان بتحتاج معدات قد لا تكون متوفرة عند غالبية الميكانيكية التقليديين زي حزمة اختبار الضغط (Pressure Test Kit) أو عداد ضغط للكشف على ضغط دائرة الوقود، غير إن ممكن يكون السبب هو مشكلة ما ببدن الطلمبة نفسه أو بمنظم الضغط لو كان موجود في بدن الطلمبة، علشان كده المشكلة دية بتحتاج احياناً قليل من الصبر والمعرفة الفنية المتخصصة.

لو حساس قياس مستوى الوقود أو العوامة مش شغالة كويس، مافيش أي حل للأسف غير تغير الحساس نفسه أو ما يعرف بشريحة العوامة أو أحياناً تغير بدن الطلمبة كاملاً.

نظريات الحفاظ على طلمبة البنزين.

سمعنا كلام كتير في طرق المحافظة على طلمبة البنزين، بعضها صحيح، وبعضها غير صحيح ولكن غير مضر، ولعل أهمها ان المالك لازم يخلي نصف التانك ممتلئ بالوقود دوماً، وبرغم ان هذا التصرف غير مضر بالمرة، ولكنه مش سبب رئيسي في إطالة عمر موتور الطلمبة زي ما الغالبية بيعتقد لسببين، أولهم هو ان قلب الطلمبة مصنع في الأساس لتبريده عبر تمرير البنزين بداخله، مش بوجود البنزين حواليه، لذلك وجود وقود حول الطلمبة مش السبب الرئيسي في تبريد قلب الطلمبة، بل بمرور الوقود عبر القلب مباشرة.

السبب الثاني هو الادعاء بإن ترك الوقود حتى مستوى منخفض قد يؤدي إلى سحب عوالق وأوساخ موجودة بالتانك، وصدقني لو انت عندك المشكلة في كمية العوالق والأتربة بداخل تانك الوقود فمرور تلك العوالق والأوساخ بطلمبة البنزين هي أقل مشاكلك، لذا اختار دوما محطات الوقود الي بتضع منها وقود لسيارتك.

علشان نفهم ليه هي مش مشكلة بالشكل المتعارف عليه أو إنها السبب لتلف قلب الطلمبة، لازم نعي أن طلمبة البنزين لا تقوم بسحب الوقود من التانك مباشرة، فكل وحدات التغذية الحديثة بها ما يسمى بوعاء السحب، وهو جزء مزود بفلتر صغير يقوم بتمرير الوقود من التانك وتجميعه داخل ما يشبه الوعاء داخل بدن الطلمبة نفسها ليقدم لقلب الطلمبة كمية ثابته ومنقاة من الوقود، لذا فوجود عوالق أو اوساخ بالتانك غالباً لن يؤثر على نقاء الوقود اللي الطلمبة بتسحبه، لان الطلمبة تقوم بسحب الوقود من وعاء السحب داخلها، واللي مرة منه الوقود عبر فلتر صغير ينظف الوقود بشكل مناسب لاستخدامه داخل الطلمبة، كمان لازم نعي أن كل طلمبات الوقود الحديثة مثبتة في الأساس في أقل نقاط التانك انخفاضاً، وده بيعدم وجوب وجود كمية كبيرة بالتانك لعمل السيارة بشكل صحيح، لان الطلمبة في كافة الأحوال بتسحب وقود من أكثر نقاط التانك انخفاضا.

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق