حساسات السيارة وانظمتها

ماهي أنظمة الوقود، وإيه الفرق بينهم؟

طقم كلاكس دنسو ياباني 12 فولت

اقرأ في هذا المقال

  • ما تعريف انظمة الوقود.
  • شرح نظام الوقود بخط الراجع.
  • شرح نظام الوقود بدون خط الراجع.

كتير بنسمع جمل زي طلمبة بنزين بروح واحدة، وطلمبة تانية بروحين، وعلشان نعرف الفرق ما بين نمطي الطلمبات، لازم نتعرف أولاً على أنظمة الوقود، وايه هو الفرق ما بين نظام الوقود بخط الراجع (Return-Style Fuel Systems)، ونظام الوقود بدون خط الراجع (Returnless-Style Fuel Systems)، واللي بصراحة بيتقال فيه كلام كتير غير صحيح مش قليل، وكان لازم نقدمه بالطريقة الصحيحة.

قبل ما نتكلم عن الفرق ما بين نوعي نظام الوقود، أعتقد نبدأ أولاً بالتعريف عن إيه هو نظام الوقود أساساً، وهو النظام المسئول عن إمداد المحرك بالوقود اللازم لتشغيله بصورة مستقرة، وبيتكون ببساطة من تانك البنزين، ونظام بخر الوقود (في الأنظمة الحديثة)، وطبعاً صاحبة السعادة طلمبة البنزين (سواء كانت كهربائية أو ميكانيكية)، ومواسير توصيل الوقود إلى مسطرة الرشاشات، والرشاشات نفسها، وبعض المكونات الأخرى البسيطة اللي ممكن تكون مش أساسية، ولكنها موجودة لزيادة استقرار المحرك، وشوية وظائف خاصة بالبيئة.

اولاً: نظام الوقود بخط الراجع (Return-Style Fuel System).

أنظمة الوقود بخط راجع

أعتقد إن تكوينه باين من إسمه، هو ببساطة نظام إمداد بالوقود مزود بخط راجع للتانك مباشرة من مسطرة الرشاشات، ففي نظام الوقود بخط الراجع بيتم ضخ الوقود من التانك إلى خط الإمداد (Feed Line) عن طريق الطلمبة، وبعد المرور بفلتر البنزين بيروح الوقود إلى مسطرة الرشاشات اللي بيكون مثبت عليها أو بجوارها صمام منظم الضغط، اللي بيحافظ على ضغط ثابت أمام الرشاشات، ولو زاد الضغط بيفتح قناة تصريف (Passage) بترجع الوقود الزائد عن المطلوب للتانك مرة أخرى.

النظام الوقود بخط الراجع ليه بعض الفوائد زي:

  1. أحياناً ممكن الإستغناء عن نظام تفريغ بخار الوقود (Evaporation Emission Control System -EVAP) وده لأن دوران الوقود بشكل مستمر بيساعد على تبريد الوقود قليلاً وبالتالي تقليل توليد بخار وقود، وبالتالي ممكن منحتجش نظام الـ EVAP من الأساس.
  2. يعتبر ضغط الوقود في نظام الوقود بخط الراجع أكثر استقراراً من نظام الوقود بدون خط الراجع، وده لأنه من الممكن تثبيت منظم الضغط في أقرب مكان ممكن من الرشاشات.

وطبعاً زي ما في فوائد في بعض العيوب، زي:

  1. نظام الوقود بخط الراجع بيتطلب أن موتور طلمبة الوقود (قلب الطلمبة) يفضل شغال بكامل طاقته طوال الوقت، وبما إننا عارفين كويس أن موتور طلمبة الوقود غالباً بيتلكك دايماً فده أمر يقصر عمره الإفتراضي بشدة.
  2. برغم أننا ممكن نستغني عن نظام الـ EVAP أو على الأقل تبسيطه شوية، لكن القوانين الجديدة لمراقبة الإنبعاثات بتجبر صانعي السيارات على إعتماد نظام البخر EVAP يعني نقدر نقول عافية وإقتدار كده هايركب يعني هايركب، وبالتالي فعدم وجود خط راجع بتعتبره الشركات أبسط، لكن طبعاً إحنا عارفين إنهم قصدهم إنه أرخص.

ثانياً: نظام الوقود بدون خط الراجع (Returnless-Style Fuel System).

أنظمة وقود بدون خط راجع

في نظام الوقود بدون خط الراجع، بيتم تثبيت منظم الضغط على نفس بدن مجموعة الطلمبة، بمعنى اننا غالباً هانشوف منظم الضغط في مكان ما على بدن مجموعة الطلمبة، والبعض ممكن يسميه بالخطأ بلف الراجع (عادي نمشيها مش هانقف على الواحدة)، وفي هذا النظام بيتم التحكم في ضغط الوقود عبر تغير سرعة موتور الطلمبة بتغير فولتية الجهد اللي رايحاله، بمعنى إني لو عايز اقلل ضغط الوقود في المسطرة بقلل الفولت اللي رايح لموتور الطلمبة وبالتالي بتقلص سرعته، والعكس لو حبيت أزود ضغط الوقود.

غالب الشركات حالياً وبداية من أول الألفينات بتعتمد على النظام ده، زي ما قلنا هو أرخص شوية في تطويره وتصنيعه، كما إنه بيساعد على تقليل الإنبعاثات الضارة الصادرة من السيارة، بإعتماد أنظمة تدوير العادم والبخر بشكل يعتبر أساسي، برغم إنه كأداء يعتبر أقل استقراراً من نظام الوقود بخط الراجع، فضلاً عن درجة حرارة الوقود بتكون أعلى من أنظمة خط الراجع، وبالتالي قد تزيد حساسية المحرك لظاهرة الصقع (Knocking).

الوسوم
اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق