حساسات السيارة وانظمتها

إزاي تختار تيل الفرامل المناسب لعربيتك.

طقم كلاكس دنسو ياباني 12 فولت

اقرأ في هذا المقال

  • تعرف على مكونات تيل الفرامل.
  • ما هو معامل الاحتكاك الديناميكي، وما تأثيره على الفرامل.
  • ما هي أنواع تيل الفرامل، وما هي مميزات وعيوب كل نوع.

إتكلمنا مسبقاً عن ازاي نظام الفرامل بيشتغل في العربية، وفي مقال سابق آخر كنا إتكلمنا على ديسكات الفرامل، وفي مقال اليوم هانكمل سلسلة شرح نظام الكبح وهانتكلم بإختصار عن تيل الفرامل، علشان نتعرف على أنواعه، ونعرف مزايا وعيوب كل نوع منهم.

قبل ما نتكلم عن أنواع تيل الفرامل، لازم نعرف الأول مكونات تيل الفرامل، وإذاي بيتصنع بإختصار شديد.

مكونات تيل الفرامل
مكونات تيل الفرامل

زي ما الصورة موضحة تيل الفرامل بيتكون من 3 أجزاء رئيسية، الجزء الأول هو مانع الضوضاء و الإهتزازات، وده جزء معدني رفيع جداً مكون من 3 طبقات أول وتالت طبقة من المعدن، والطبقى الوسطى من المطاط، ووظيفته واضحة من إسمه، هو جزء مخصص لتقليل الصوت والإهتزازات.

الجزء التاني هو البدن الخلفي للتيل، وبتصنع من معادن رخيصة في الغالب، وأحياناً بيتم معالجته لمقاومة الصدأ حسب الشركة المصنعة للتيل.

الجزء التالت، وهو مواد الإحتكاك واللي تعتبر أساس التيل وهي المواد اللي بإختلافها بيختلف نوع التيل نفسه، وبيتم لصق المواد ديه بالبدن الخلفي بطريقتين غالباً، إما بلزقهم بلاصق عالى الجودة، أو بصنع سطح قابل للضغط على البدن الخلفي (حاجة كده شبه المسامير) ومع اللاصق بيتم ضغط مواد الإحتكاك على البدن الخلفي وبالتالي تثبيت أكتر، والطريقة التانية أفضل، وأكثر تحملاً.

طيب، دلوقتي وضحنا مكونات التيل العامة، وقبل ما ندخل في أنواع التيل اسمحولي نمر بسرعة على نقطة هاتحدد مزايا بعض أنواع التيل عن الانواع الاخرى، النقطة ديه هي معامل الإحتكاك الديناميكي أو Dynamic Friction Coefficient المعروف إختصاراً بإسم DFC وببساطة ده معامل نقل التيل لقوة ضغط الفرملة، بمعنى أني مثلاً لو قوة ضغط الكاليبر على البدن الخلفي للتيل هي 1000 نيوتن، والقوة اللي وصلت لديسك الفرامل مروراً بالتيل هي 400 نيوتن يبقى معامل الاحتكاك الديناميكي للتيل ده هو 0.4 يعني التيل من النوعية ديه بينقل 0.4 من القوة اللي وصلت ليه، والتيل التجاري العادي معدله ما بين 0.35 إلى 0.42 دي إف سي، وفي بعض انواع تيل الفرامل المستخدم لسيارات السباقات ممكن يوصل معدلها إلى 0.65 دي إف سي.

كده خلصنا نقاط المقدمة نخش بقه في الانواع ومزاياها وعيوبها.

أنواع تيل الفرامل
أنواع تيل الفرامل

تيل الفرامل الأورجانك.

أورجانك هنا مش بتاعت الخضار والفاكهة، هو المقصود بيها هنا أنه مصنع من مواد شبه عضوية زي الزجاج، والكيفلار، والمطاط، مع بعض الألياف وما بينهم لاصق قوي، النوع ده هو الأرخص ما بين كل الأنواع، وبيميز عن باقي الانواع أنه أقلهم انتاجاً للصوت، وأعلاهم حفاظاً على الطنابير.

لكن يعيبه إنه أقل أنواع التيل عمراً، وأكثرهم إنتاجاً لغبار الفرامل، كمان يعيبه أن معامل DFC الخاص بيه قليل، لأنه يعتبر أكثر أنواع التيل طراوة.

تيل الفرامل المعدني.

بصوا هو مش معدني معدني يعني، لكن النوعية ديه من تيل الفرامل بتنقسم لقسمين أولهم هي الشبه معدنية (Semi-Metallic) أو ساعات بتتسمى تيل قليل المكونات المعدنية (Low-Metallic)، وبيكون ضمن مواد الإحتكاك الخاصة بالتيل حوالي 30 إلى 50 % برادة حديد أو برادة نحاس، مع خليط المكونات الموجودة في التيل الأورجانك.

النوع ده هو الأكثر إنتاجاً واستخداماً في الوقت الراهن، لأنه بيمتاز بسعره المناسب، وكفائته المرتفعة، وعمره الطويل، ومعامل DFC المرتفع، لكنه أكثر أنوع تيل الفرامل إصداراً للصوت، واقساهم على الطنابير.

القسم التاني من التيل المعدني هو التيل المعدني بالكامل (Full-Metallic) وده تقريباً لا يستخدم إلا في سيارات السباق،يعني مالناش دعوة بيه، وبرتفع نسبة المكون المعدني فيه لتقريباً 70% وطبعاً يعيبه أنه بشع في تعامله مع الطنابير، وصوته عالي جداً، كمان كفائته وهو بارد قليلة جداً ولازم يسخن كويس علشان يشتغل مظبوط.

تيل الفرامل السيراميك.

تيل السيراميك هو كأنك أخدت نوعي التيل اللي سبق واتكلمنا عليهم وضربتهم في الخلاط، يعني هو ببساطة واخد مزايا كل نوع منهم وساب عيوبهم على جنب كده وبعد عنهم، وده عن طريق إنه استبدل المواد المعدنية في التيل المعدني بألياف من السيراميك، وبالتالي هايبقى زي التيل الأورجانك، في انه صوته واطي، والمحافظة على الطنابير، وهاياخد من التيل المعدني عمره الطويل، إنتاجه القليل من غبار الفرامل، ومعامل DFC المرتفع، وأدائه المتوازن، يقال إن عيبه الوحيد إن سعره مش رخيص، ولكن مقارنة بالأنواع التانية أنا شايف إن سعره معقول ومناسب لما يقدمه.

الوسوم
اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق